८ साउन, काठमाडौं
जनता समाजवादी पार्टीका अध्यक्ष महन्थ ठाकुर निर्वाचन आयोगको निर्णयविरुद्ध सर्वोच्च अदालत पुगेका छन् ।
ठाकुरले ‘हेड काउन्ट’ गर्ने निर्वाचन आयोगको निर्णय रोक्न माग गर्दै सर्वोच्च अदालतमा रिट दायर गरेका छन् । अध्यक्ष ठाकुरको तर्फबाट प्रदीपकुमार पाठकले रिट दायर गरेका छन् ।
रिटमा आफूले वैधानिकरूपमा पार्टीको निर्णयबमोजिम हेरफेर गरेको केन्द्रीय कार्यकारिणी समितिलाई मान्यता नदिई पुरानै समितिको ‘हेड काउन्ट’ गर्ने निर्वाचन आयोगको निर्णय कार्यान्वयन नगराउन निर्वाचन आयोगका नाममा अन्तरिम आदेश मागिएको छ ।
निर्वाचन आयोगले जसपा विवाद निरुपणको क्रममा साउन ११ गते बहुमत परीक्षण गर्न निर्वाचन आयोगले पार्टीका ५१ जना कार्यकारिणी सदस्यलाई प्रमाणसहित उपस्थित हुन आदेश दिएको थियो ।
कार्यकारिणी समितिमा जसपा अध्यक्ष उपेन्द्र यादव पक्षले ३१ जना सदस्य रहेको भन्दै बहुमत रहेको दाबी गरेको छ । तत्कालीन समाजवादी पार्टी र राजपा नेपालबीच एकीकरणपछि बनेको जसपा नेपालमा ५१ सदस्यीय कार्यकारिणी समिति बनाइएको थियो ।
तर महन्थ ठाकुरले गत पुस ७ गतेको बैठकले आफूलाई अधिकार दिएको भन्दै कार्यकारिणी समितिमा हेरफेर गरेका थिए । आयोगले ठाकुरद्वारा हेरफेर गरिएको कार्यकारिणी समितिलाई भने मान्यता दिएन ।
