१९ असार, गौर ।
केही दिन यता प्रदेश २ को विभिन्न जिल्लामा जंगली हात्ती मानव बस्तीभित्र देखिएका छन् ।
रौतहटमा पनि शुक्रबार राति जंगली हात्ती बस्तीमा पसेको छ । जंगली हात्ती बस्तीमा पसेपछि स्थानीयवासी त्रसित भएका छन् ।
गएराति देवाही गोनाही नगरपालिकाको उत्तरी क्षेत्र हुँदै बस्तीमा पसेको एक जंगली हात्ती शिवनगर हुँदै रौतहटको माधवनारायण नगरपालिकाको वडा नं. ५ मिठुअवामा आइपुगेको छ ।
सो हात्तीले शिवनगरको एक घरमा क्षति पुर्याएको छ भने मिठुअवामा किसानको भकारी फुटाएर धान खाएको छ ।
गाउँबस्तीमा जंगली हात्ती हिंडेको देखेपछि स्थानीयले प्रहरीलाई खबर गरेका छन् ।
हात्ती नियन्त्रणमा लिन वन कार्यालय, नेपाली सेना र चितवन राष्ट्रिय निकुञ्जको टोलीलाई भनिएको प्रमुख जिल्ला अधिकारी इन्द्र देव यादवले बताए ।
