नवलपुरमा १० महिनामा थपिए २७ सय उद्योग तथा व्यवसाय

A view of newly constructed Hongsi Sivam Cement Industry in Sardi of Nawalparasi district, on Friday, December 22, 2017. The company is established in joint venture with the chinese and Nepali investment. Photo: RSS

९ जेठ, नवलपरासी (बर्दघाट सुस्तापूर्व)

नवलपुरमा १० महिनाको अवधिमा करिब दुई हजार ७ सय उद्योग व्यवसाय थपिएका छन् । चालु आर्थिक वर्षको वैशाख मसान्तसम्मको अवधिमा जिल्लामा एक हजार ३ सय ५४ उद्योग र एक हजार ३ सय ३७ वाणिज्य गरी कूल दुई हजार ६ सय ९१ वटा नयाँ उद्योग तथा व्यवसाय दर्ता भएको घरेलु तथा साना उद्योग कार्यालय नवलपरासी पूर्व नवलपुरका प्रमुख विक्रम सुवेदीले बताए ।

कोरोना कहरकै बीच जिल्लामा यो सङ्ख्यामा नयाँ उद्योग थपिएको हो । थपिएका उद्योगमा कृषि, पशुपालन, पर्यटनसम्बन्धी उद्योग धेरै भएको कार्यालयको तथ्यांक छ ।

कोरोना कहरका बीच धेरैजसो कृषि तथा पशुपालनतर्फ आकर्षित भएकाले यो समयमा समेत नयाँ उद्योग दर्ताको सङ्ख्यामा कमी नआएको कार्यालय प्रमुख सुवेदीको भनाइ छ । सरकारले कृषि तथा पशुपालनमा विभिन्न सुविधा तथा अनुदान उपलब्ध गराउनुले समेत यसतर्फको आकर्षण बढेको उनले बताए । ‘राज्यले अहिले कृषि, पशुपालनमा विभिन्न सुविधा र अनुदान उपलब्ध गराउँदै आएको छ,’ सुवेदीले थपे, ‘यसैले यसतर्फ नागरिकको आकर्षण बढदै गएको छ ।’

कोरोनाको असरले अन्य रोजगारका बाटो बन्द हुँदा विकल्पका रूपमा आफैँले कृषि र पशुपालन गर्नु अर्को कारण भएको उनको निष्कर्ष छ । नवलपुर कृषि र पशुपालनका लागि उपयुक्त क्षेत्र भएकाले यहाँ धेरैजसो यसतर्फ आकर्षित हुन थालेका छन् ।

कृषि र पशुपालनका सहुलियत कर्जा उपलब्ध हुँदा लगानी गर्नसमेत सहज हुँदा यस क्षेत्रमा लगानी बढेको प्रमुख सुवेदीले बताए । ‘कोरोना कहरका कारण अहिले अन्य पेशा, व्यवसाय नहुँदा, स्वरोजगारमूलक पेशाका रूपमा कृषि, पशुपालनमा लगानी गर्ने बढेका छन्,’ कार्यालय प्रमुख सुवेदीको भनाइ छ ।

चालु आर्थिक वर्षको १० महिनामा ५ सय १६ उद्योग नवीकरण भएका छन् । यसै अवधिमा ६ सय ९२ व्यवसाय नवीकरण भएका छन् । निधेषाज्ञाका कारण अहिले नयाँ उद्योग तथा व्यवसाय दर्ता नभएको कार्यालय प्रमुख सुवेदीले बताए ।

अवस्था सामान्य भएको भए नयाँ उद्योग तथा व्यवसाय थप हुने सङ्ख्या अझै बढ्ने निश्चित भए पनि निषेधाज्ञाका कारण पछिल्ला केही महिनामा दर्तामा कमी आएको हो । घरेलु तथा साना उद्योग कार्यालयले उद्योग र वाणिज्य दर्ता, नवीकरण, ठाउँसारी, पूँजी वृद्धि, उद्देश्य थपमार्फत १० महिनामा कूल रु एक करोड १९ लाख ५२ हजार २ सय ७० राजश्व सङ्कलन गरेको छ ।

उद्योग तर्फबाट रु ६६ लाख ३५ हजार ९ सय ७५ र वाणिज्यतर्फ रु ५३ लाख १६ हजार २ सय ९५ राजश्व सङ्कलन भएको हो । (रासस)

प्रतिक्रिया दिनुहोस

Please enter your comment!
Please enter your name here